من غير ادان شعر أشرف الشناوي
انا راضى
حكمك يازمن
مهما يكون
لو لسه قادر
يازمن اكسر
وخون
والعب بقلبى
واعمله للحزن
جون
من غير امانى
ازاى نعيش
وسط البشر
انا قلبى من
قسوة ايديك
أصبح حجر
حتى الغنا
طالع كدا
من غير وتر
حتى السما
حلفت ماينزل
يوم مطر
يغسل وشوشنا
م التراب
والا السفر
غربل وهز
الامنيات
تلقى القلوب
جوا السكات
تلقى اللى فاضل
منها حبة اهات
تلقى الدموع
ماليه الضلوع
من خوف وجوع
راسمه الطريق
من غير رجوع
طافيه الشموع
دايسه الامل
تحت العجل
بكره اللى جاى
من غير ملامح
تشبهك
جاى بالعجل
شايل فى كفه
المستحيل
من غير ادان
قام الصلا
قطف الورود
غسل السما
بالبسمله
طفش الحمام
الا انا.
التعليقات مغلقة.