إمام المجروحين بقلم.. مدحت رياض
كل الغناوي
اللي انت عاشق فنها
متلحنة علي ناي حزين
ويا الآهات
اللي انت ساكن قلبها
لما ابتدت ضاعت سنين
وانا بين زحام المحرومين
بنده وألم المجروحين
أعزف لهم آخر ما غنى
القلب في وداعَك هنا
فات قد إيه يمكن سنة
يمكن يومين
لساها غنوة بعدنا
تنعي الليالي المحزنة
والناي بيغرق في الألم
وأفضل حزين
الصبر أصعب من حجر
رافض يلين
ينزل مطر ويغيب مطر
وتعبت من بحر السفر
فرجعت والناي عزوتي
وانده لمين
يمسح دموع طال عمرها
واحترت عمري في امرها
فبقيت امام المجروحين
والباقي ايه غير الصدي
من صوت بيتنهد وجع
والورد يترجى الندي
ولا حن له ولا يوم ورجع
يلمس في أوراقه بندم
دبلانة من عزم الألم
صوت الندا تاه وانتحر
لساه بيتمني المطر
وانا تحت أوراق الزمن
بعزف على الناي بالسكوت
يمكن اكون تحت الخطر
او هو ده اللي اسمه موت؟؟
هياها سكة مضلمة
من فين لفين
وانا وسط أمواج الشجن
قبطان سفينة مجروحين
التعليقات مغلقة.