حبة ملامح للبعاد بقلم مدحت رياض
فراغ في روحي
بيبتدي يملأ المكان
فيغيب أمان
في زوايا قلب بيتوجع
م الخوف عليك
حتى في إيديك
مبقاش سلام
يوصل لقلبي يطمنه
النبض كان في الإيد
بيوصل للوريد
ويحس روح بتأمنه
نقط الحدود بيننا ابتدت
ترسم ملامح للبعاد
ومفيش معاد
لنهاية الشوق والحنين
طب قولي مين
هيحس قلبك بعدي انا
وانا مين هيمسح دمعتي
مين وانت غايب يسمعك
ويحس صوتك دندنة
وانا مين يميل كفتي
لو تهت بين ناس أو ظروف
لو كلي خوف
مين ايده هتطبطب امان
مين يجمع الروح بالمكان
ويسد كل فراغ بدأ
مين هكتبه في سطوري
دايما مبتدأ
مين يكتمل بيه الكلام
مين ينقذ الروح م العدم
ويعوض العمر اللي راح
مين هلمسه وقت الألم
وتطيب معاه كل الجراح
مين خطوته
تفتح لقلبي في سكته
والصخر لو سد المدى
مين بابتسامة يفتته
لو من بعيد
فيدوب جليد
كان فاصل الروح للأبد
وبحس قلبي بيتولد
والنبض يرجع للجسد
والقى الأمان
فيه فراغ
في روحي بيبتدي
يملا المكان
التعليقات مغلقة.