ولد أكابر بقلم.. محمد كسبه
كفاية صبر ما نيش صابر
ده الحب سهم قوي و قادر
ساكن في قلبي و وريدي
و وقعت و أني ولد أكابر
يا خسارة مش عارفه جنابي
ولا شاغلة بالها بغيابي
قلبي وقع يابا ف إيدي
علي كيفها حيرتي و عذابي
ولد الأكابر من يومه
راجل زين ملو هدومه
عاشق و بيحب يا ولدي
و العشق ده مطير نومه
لو إنتي فول أنا كيالك
لو كنتي فرسة أنا خيالك
بس إنتي في الحب تزيدي
نهار و ليل هشغل بالك
البت لونها من لوني
و عيونها حلوة و عجبوني
بصراحة كده داخلة دماغي
في بعادها بيجن جنوني
دايب أنا في نقش الحنة
مش قادر أصبر و أستنى
ده هواها جاي علي مزاجي
دي حورية من حور الجنة
الكون جماله فيها إتلخص
بحر العسل عمره ما يخلص
ولد الأكابر مش ناجي
غرقان و مش عارف أفلفص
مغرم صبابة يا ناس هايم
زينة الصبايا ورد مواسم
زينت بيها راسي و تاجي
هتحن ميتا ربك عالم
التعليقات مغلقة.