آخر كلام شعر/رضا أبو الغيط
وكان آخر كلام بينا
أشوف وشك
يا قلبى بخير
مادام حابب تفوت حُضنى
وتنسى العٍزوه واللمه
وطعم الميه ف القله
وكوز الزير
مادام حابب تعذبنى
وتحرمنى
سماع كلمة
صباح الخير
مادام ناوى تودعنى
وتوجعنى
وتركب موجة الغربه
ف بحر الحُزن والغُمه
بدون تفكير
بقولهالك
يا نن عيونى من جوه
يا نبض القلب والقوه
أشوف وشك
يا قلبى بخير
وأنا بصرخ وأقول يامه
عشان خاطرى
بلاش دمعة عينيكى تسيل
وتروى الشط والمينا
وتسقينا كاسات الويل
بلاش دمعك يزيد همى
ويجرح ف الوريد دمى
دانا همى …يا أمى تقيل
عشان خاطرى
سيبينى أطير
مادام الدنيا مش راسيه
وايدها الآسيه بتلطش
ف وشى كتير
أبوس رجلك
سيبينى أطير
م انا عايش على الهامش
بقالى سنين
ف وسط الصُحبه والعيله
ولسه فقير
أبوس ايدك
بلاش حزنك يعذبنى
ووصى القلب يدعى لى
بكل الخير
ونزلت دمعة من عينا
كلامها ف الحقيقه كبير
على شط الفراق كُنا
وكان الحزن جوانا
بيتدارى .. ف قعر بير
بنتبسم كما المجاريح
ونتنفس تراب الريح
وحلم العُمر يبقى لنا
جناح ونطير
ويحضن كفنا الفكه
وننسى قاعدة الدكه
وشوك مفروش على السكه
بيتعارك مع التغير
ورُحت بعيد
وراح عمرى اللى عشته وحيد
وهى قاعده تستنى
يهل هلال.. ليالى العيد
وعيد عدا
وراه كام عيد
لعادت لينا فرحتنا
ولا قلب الحبيبه سعيد
خدتنا الغربه للتوهه وللأحزان
ومن توهه إلى توهه
سنين عدت من الحرمان
ولسه ف ودنى صوت أمى
ف عز الشده بيقولى
أشوف وشك .. يا قلبى بخير
التعليقات مغلقة.