عزة نفسي بقلم.. أشرف يوسف
عزة نفسي عليا بتفرض
إني أعيش دايما وحداني
وابعد عن كل اللي باعوني
واللي عشانهم شوقي نداني
مش بإرادتي ولا كان ذنبي
إني أغير يوم عنواني
إنتوا اللي اختارتوا تبكوني
وتصاحبوا العزال علشاني
وانا علشانكوا كنت بضحي
واخلص ليكوا بكل كياني
ليه بسهوله تخونوا مشاعري
وانا مجني عليا ومش جاني
شكرا ياللي قتلتوا الفرحه
وتعبتوني في ليل أحزاني
وفرشتوا الأشواك في طريقي
ولا حسيتوا بجرحي ثواني
بقي كل دا علشان حبيتكوا
أتعذب في هواكوا واعاني؟!!
دا انا إنسان له قلب وروح
أنا مش جاي من كوكب تاني
أنا مش جاي
من كوكب تاني
التعليقات مغلقة.