مات عادي بقلم.. وحيد علي الجمال
واتفكك المركب
راح مع الساري
وفضلت في الزحمة
ماسك في مجدافي
يمكن على ضهري
يفضل هواك دافي
خوفت إن يوم اغرق
شايل في احمالي
سافر هناك قبلي
وفي ضد تياري
عشمت فيك نفسي
بعت اللي كان شاري
حبيت انا اركن
واحمل على كتافي
البحر كان رافض
يشبك في خطافي
صممت ابيع الصبر
وامشي معاك حافي
يابايعين البخت
بدلتوا ليه حالي
عبيت انا في السُحت
لحظة ما راح مالي
فضيت هموم الوجع
والحِمل كان فاضي
هو الميلاد في الحزن
سنه بقى في القلب
عايشه بلا ماضي
مين اللي قال الظلم
هيصحصح القاضي
تغير حروف اللفظ
أسلوب بقى عادي
طب عَدِّل البرواز
انشر لها صورة
طلع الحداد مرفوض
والدمعة محسورة
فَرَّق ورق حظي
وابعد عن الكومي
حَوِّشت فيك فرحي
ونسيت معاك كومي
ودفنت بعدك جرح
ريحته على سطوحي
عديت سنين عمري
ومعاها أشواقي
مالقتش بعدك حد
لسه معاه باقي
فسرت بعدك حلم
شوفته معاك صاحي
النجم عام في البحر
موج السما عالي
انا كنت واقف تحت
نزل المطر ساقي
كان لسه جوه الفحت
دايره وضلمة وسور
وفهمت بعد الوقت
إن الوجع بالدور
الشكل نفس الشكل
الضلمة زي النور
ادعي أن ماطَوِّلش
الوقفه جوه الدور
ياتاخدنا كلنا وش
يا تغيرولي الفَرش
وتقولوا مات.. عادي
التعليقات مغلقة.