وليكى فى القلوب صوره بقلم..صفوت راتب
صباحك ورد ومندِّى
صباح الفُلّ يا بلدى
عشقتك فوق حدود العشق
وداب ف محبِّتك ولدى
صباح فارد على نيلك
نايات تعزف مواويلك
وانا ع الشطّ، وخطايا
تشدّ العزم وتجيلك
نَدَاكى ع الصباح لولى
وليلك ضىّ قناديلى
وسهرانه العيون حُرَّاس
وفيكى قلوب بتدعيلى
أنا قلمك وكراسك
وتِرْس ف مصنعك، فاسك
يبوس الأرض فتزهَّر
واقوم م الفجر ابوس راسك
بلاد العزَّه يابلدى
بنيت قبل التاريخ مجدى
إيمانى بيكى زاد عزمى
ومن ربّ العُلا مَدَدِى
وليكى فى القلوب صوره
وليكى كرامه فى السوره
ودم اخواتى وجدودى
كتب ،، يامصر منصوره ،،
التعليقات مغلقة.