سلامى لكل الأحبة بقلم.صفوت راتب
وفات الكتير .. وباقى القليل
ويكتب علينا الزمان الرحيل
والله أعلم ..
إذا كنا تانى هنتلاقى ولَّا اللقا
مستحيل ..؟!
تمرّ الليالى .. تعدِّى السنين ..
وتمحى الأسامى .. وتطوى الحنين ..
ويمكن هتفضل أسامينا ذكرى ..!
ويمكن قلوب الأحبَّة هيفضل
حنينها لزمان المحبّة الجميل ..!
سلامى لكلّ الأحبَّة اللى كانوا
يهلّوا علينا .. تهلّ النسايم ..
بهمسه .. بكلمه يفوح العبير
ونظره تحيَّر .. تسهَّر عيون ..
ومن نظره واحده أنا قلبى هايم
هواكوا رمانى .. ولخبط كيانى ..
وشتّت خطايا ف كل الدروب
وعذّبلى قلبى العذاب اللى فوق
احتمال القلوب
سوا إحنا هُنَّا عليكم وبعتم ..
سوا لينا حنّت قلوبكوا ورجعتم
هنرحل ..
وفينا الهوي لسه باقى
وبرضوا علينا الأحبَّه ما هانوا ..!
#صفوت راتب
التعليقات مغلقة.