بلاش تهريج …
بقلم وحيد علي الجمال
(بلاش تهريج )
مشغول بهموم الناس ياوحيد
وكأن الخوف مابقاش جواك
وتحول قلبك كله حديد
فجأة اتجرأت.. بسرعة نطقت
وكتب الشعر بشكل جديد
من امتى بقيت في العشق مريد
من امتى بقيت في الهم شريك
اكتب في الحب بلاش تهريج
اطلع م اللون ده الله يخليك
طول عمر الدنيا بتضحك ليك
وساعات وكتير بتعاند فيك
صبرك على قدك بيكفيك
اخلاصك بالصدق هيرضيك
حافظ على بعضك ووجودك
على بعض الدنيا ما تسوى مداس
قلبك في الأصل ده كله ازاز
مهما تعكره ابيض شفاف
اوعاك تكسره قلبك الماظ
راجع بتخبط في الكراكيب
وعاملي مناضل م الحرافيش
اوعاك صدقت إن انت أديب
وهتكتب شعر بشكل مريب
وكمان هترد بشكل ظريف
وتبان في الصورة إن انت ملاك
ونضيف وشريف وزيادة.. عفيف
ولا كنت شريكهم ف التخاريف
ولا كنت ساعتها بشكل مخيف
ولا عمرك مرة مشيت على الحيط
من امتى الناس كانوا في بالك؟
بالعافيه بنعرف أخبارك
حتي عيالك مش في حسابك
هيجت النمل مع الصراصير
وكأنك في الضلمه مخاوي
ومصاحب قورطة من العفاريت
اجمل حاجة إن انت تعيش
في الدنيا كأنك حد عبيط
وحيد علي الجمال سرس الليان محافظة المنوفية جمهورية مصر العربية
التعليقات مغلقة.