فيه اسئلة ملهاش جواب بقلم..مدحت رياض
برضه احتمال
إن السؤال ميكونش ليه
أبدًا جواب
فمتسألوش وافتح عينيك
حاول تشوف
يمكن نوفر قبلها على نفسنا
حبة كسوف
أصل الجواب باهت حزين
مليان بخوف
واستامبا واحدة متتنسيش
هي الظروف
فيه أسئلة معناها
يفتح في الألم
ولا ألف باب
فيه أسئلة تبدأ عتاب
فيه أسئلة فعلا صحيح
غير مرتبط بيها الجواب
فيه أسئلة من حزنها
بتموت على طرف اللسان
في سؤال كمان
لو متجاوبش
يعلق الروح بالمكان
بتموت هناك وقت اما كان
وكأنها رافضة الاجابة المبهمة
من غير بيان
في سؤال بيطلع م السكات
مبننطقوش
وسؤال على رموشك يبات
ومتسألوش
بتحطه دايما
جوه بند المحظورات
في إجابته يمكن
فيه شعور هتحسه مات
وتلوم لسانك ليه مقالش
وغيره قال
برضه احتمال
من ألف مليون احتمال
إن الجواب ميكونش ابدا
ليه علاقة بالسؤال
التعليقات مغلقة.