“الإشارة” قصيدة عامية بقلم وحيد علي الجمال سرس الليان محافظة المنوفية جمهورية مصر العربية

“الإشارة” قصيدة عامية بقلم وحيد علي الجمال سرس الليان محافظة المنوفية جمهورية مصر العربية

كنت واقف في الإشارة
نفسي لحظه تغور وتفتح
مد إيده .. هات سيجارة
كنت فاكر آل بيشحت
راح مترجملي العبارة
جوه بير الغدر يوسف كان بيضحك
اضحك اضحك
اضحك اضحك اوعي تشرَق
خلىٰ قلبي بسرعة قهقه
ارمي همك عيش وزقطط
مهما كان الحال مضايقك
هو نفسه بكره يصغر
يسر جايلك بعد عسر
جوه قلبك خش بص
ابني بيت الفرح رُص
هو .. هو لما كان واقف في كتفي
واحنا بنصلي الجنازة
شد ضهري وقال كفايه
اوعي تطمع في الزيادة
خلى حزنك نُص نُص
وبغتاته في المرايا وشي قالي:
لسه فاضل في الحكاية
خطوه واحدة اطلع وكش
كان بيجري كان بيبكي
اوعى توصل بس بدري
خفت منه روحت عازم بالسيجارة
قام فركها وقالي شكرا
كان باصصلي قالي آسف
اوعى بس تكون بتشتم
كان عاذرني لما قطَّعت الرسالة
فجأة سابني غصب عني
قالي اوعي تخاف وتهرب
بكره دمعك راح يجف اسمعها مني