لملم بواقي الأمل بقلم رضا أبو الغيط
لملم بواقي الأمل
من بين رجول الخوف
وافتلها شمعة ف سكتك
واكتب بنورها حروف
تبقى لعيونك ضي
ولنبض قلبي الحي
صوت السلام ف زمان
زي القمر مكسوف
لملم بواقي الأمل
من بين رجول الخوف
ما تخافش م الأحزان
وزمان ماهوش مضمون
ده الظلم لو كان جان
الصبر هيكون عون
والكون هيرسى ف يوم
على شاطئ المظلوم
ويقول بصوت مسموع
حلمك ما يعرف خوف
لملم بواقي الأمل
من بين رجول الخوف
ارفع شعار ممنوع
الجري خلف دموع
ف طريق ما فيهش رجوع
ولا يعرف المعروف
وارسم بلون الورد
الفرحة فوق الخد
وأهمس ف ودن الشمس
تتحدى أي خسوف
لملم بواقي الأمل
من بين رجول الخوف
التعليقات مغلقة.