سكة سفر بقلم.. أيمن فوزى
سكة سفر
وخداني ليه
في سكة سفر
مفيهاش رجوع؟
كل اللي بينا
كان وجع
كل اللي بينا
كان دموع
بعد وتلاقي
ويوم تلاقي
قلبي قايد عليك
م الفرقة شموع
ومهما أبعد ترجعيني
يا قلب
ساكن في الضلوع
ولما أقوم الليل
أحكي لهفتي
والقلب خايف
والصوت خشوع
دي الحكايه أصلها
ع الهوامش
والهوامش متكسرة
عنيدة
متقبلش الخضوع
وخداني ليه
في سكة سفر
مفيهاش رجوع ؟؟؟
شجرة طويلة مفرعة
طايله السما
ملهاش جذوع
متفرقين
نتلاقى لما الريح تهب
من أمته
بتتقابل فروع؟؟
والفرقة لما
تطول قلوب العاشقين
تصبح أشكال
وألف نوع
منها اللي يحيا ببصتك
واللي روحه ترده فيه
من ضحتك
واللي بردو بلمستك
تتلم فيه كل الصدوع
وخداني ايه
في سكة سفر
مفيهاش رجوع؟؟
قلب الرهيف
كم مرة يحلف يرتجع
ويحن تاني
حتى لو تاه
في الجموع
والناس كتير
ورغم الزحام
ريحتك دي مسك
بين الناس يضوع
وبتعرفيني
لو روحي تايهه
متفرقة
بين المداين والنجوع
وخداني ليه
في سكة سفر
مفيهاش رجوع؟؟
التعليقات مغلقة.