على بابك بقلم .. حسن أبو عرب
صباح صابح يغنيلِك
صباح وبطعم مواويلِك
كاسات بالحب تملَاهَا
سواقي حليبها مِن نيلِك
وشمس خيوطها مِن فضه
تِصُب الضَي نتوضا
وسارجَه منهَا قناديلِك
قمر سهران على دارنا
ونسمة ليل تعَطَرنَا
وشاورِيلِي وانا اجِيلَك
أبوس راسِك
وابَدِلِّك سنين ويلِك
واقولِّك ع اللي جوايا
وافَضفَضلِك وأحكِبلِك
يانبص القلب بناديلِك
ياريتنِي كُنت مندِيلِك
ولَامِس بالحنان خَدِك
واتعطَر بترتيلِك
م انا درويشِك العاشق
ياعِشي الدافي انا طيرِك
ولَا ارضَاشِي بوطن غيرِك
أَصَلِّي الفجر على بابِك
فى محرابِك
معايا كُل أحبابك
نمِد كفُوفنا ندعِيلِك
التعليقات مغلقة.