وداعا يا اعز الاحباب بقلم.رضا أبو الغيط
ملعون الموت
اللي يفرق بين الأحباب
ملعونة العيشة على الهامش
ف زمان كداب
ملعونة يا دمعة بترميني
جوه السرداب
وعذاب مش عارف
ايه معنى حُب الأصحاب
من بَعدك مين هيكون ليا
نور القنديل
ودليل لطريق الحرية
لو فاض الكيل
من بعدك مين هيكون حرفي
جوه الدواوين
وأنين الفكرة اللي بتشغل
كام عقل رزين
مين غيرك بس اللي يجمع
شمل الأغراب
ويفرق حُبه على العيلة
من غير أنياب
مين غيرك لما تضيق بيا
يفتح لي الباب
ويقولي اتفضل سلطنتي
انت السلطان
وانا ليك بواب
مين بعدك ف الدنيا الفانية
هيكون لي كتاب
أتعلم منه ازاي أكتب
وأصعد أعتاب
وارسم بحروفي اللي ماشافت
غيرك استاذ
شاعر متواضع ما يهمه
سحر الألقاب
التعليقات مغلقة.