قلب جريح …
بقلم مدحت رياض
(قلب جريح )
انا لسه هناك
وف ايدي الحلم
اللي اتفسر
ومعايا القلب
اللي اتكسر
من عزم الريح
وبقلب جريح
وبايد بتشاور بتغطي
وكأني سعيد
وكان الأيام كات سهلة
وجه فجر جديد
انا حد بيكدب على نفسه
والاغرب اني بصدقني
وبرسم احلام
وبطير ومحدش يلحقني
في لحظة ما بنام
والصدمة بتبدأ مع روحي
ومع اول ضوء
بتلم الغايب في جروحي
وساعتها بفوق
على واقع نبضه مهوش طالع
والعمر بيمشي وموش سامع
ولا صوت إنذار
وكأن القلب وإحزانه
بيقيدوا في نار
والفرحة وقلبي المتجرح
فيه بينهم تار
انا لسه هناك
لحظة ما المركب وشراعها
انقسموا لنصين
النص مسافر ومودع
والباقي على الشط اتقطع
ييجي مليون آه
لا هو قادر يركب ويسافر
وبقيته مع الموج بيعافر
يوصل لامان
انا لسه هناك
وحشتني الضمة لاحلامي
وكانت في ايديك
وحشتني الضحكة في أيامي
وكانت لعينيك
انا لسه هناك
مستني اللحظة اللي تقرب
واكون وياك
واحكي لك ايه كان من بعدك
واعيشه معاك
انا لسه في لحظة ما فارقتك
مستني هناك
التعليقات مغلقة.