تورتين ضى …
بقلم أشرف الشناوي
……..تورتين ضى…….
تمم بالليل على كل جراحك
واطمن عالوجع
المنقوع فيه روحك
واستنى الفجراللى معدى
يمكن يرميلك تورتين ضى
تبدر بيهم فى براحك
وغيطان البور
سلم على نفسك
طبطب بايديك
على القلب المكسور
واتشعبط فى احبال
الامل الدايبه
الدنيا ماهش دايمه
وارسم بدموعك
حواديت م الخوف
مش كل الضحك
اللى بيطلع م القلب
فيه ضحك
بيطلع م الغلب
عافر بايديك واسنانك
ماهو لازم هتكمل أيامك
بالطول والعرض
وان كان الضحك دا سنه
فالحزن هيبقى الفرض
والقطر اللى انت ركبته خلاص
مش راجع تانى الارض
حاول ترسم صبحك
بالطباشير
حاول تطلع م البير
تمم على كل
جراحك والمسامير
وان عدى عليك الفجر
اتشعلق فى عباته
واخطفلك كام غنوه
تصبر قلبك فى عذابه
صدقنى الورد بيدبل
لو قبل اوانه
كمل مشوارك وباصرار
الدهب اللى بيفضل فى النار
لملم امانيك جواك
واعملك كام مركب
علشان ماتعدى البر التانى
يمكن تلقى فى اخر عمرك
حلم فى كفه اغانى
ياتكمل مشوارك
عميانى. …………………
اشرف الشناوى
شاعر عاميه
المنصوره
البرامون
التعليقات مغلقة.