رباعيات /حادثة الدقهلية بقلم .. رضا عبد الحميد
الموت بقى مجاني والروح بقت ببلاش
سواق ماكانش في وعيه والسكه ماشيفهاش
شارب مسلطن دماغه بغيره مش مهتم
رمى الضحايا في الترعه وهوه مانزلهاش
ياعيوني جودى من دموعك نهر
على شباب بيموتوقبل مادفعو المهر
بغلطه من طايش لاعنده ضمير ولادين
بيت قلوب الدقهليه في ليله سوده وقهر
ضحايا من أسره واحده وضحايا متفرقين
ياأسطى انتا الصح وهما اللى غلطانين
همااللى لماشافوك ماكانوش قوى شايفين
وعشان ينولوالشهاده قامومعاك راكبين
سايق وحاطط على ودنك التليفون
واخد الطريق صاروخ بسرعة المجنون
كأن اللي راكب معاك مش جسد ولا روح
كأنك محمل خشب اوورق كرتون
هوانتا عشان سواق لازم تكون واد خط
وتجري بالعربيه وتشيل فيها وتحط
وان حد نصحك وقالك هدى بقى السرعه
عليه ترد بحقاره وبصوت قبيح منحط
نعيب عليك يا اسطى وللا على المسئول
اللى عملك رخصه اكيد دا كان مسطول
فين التحاليل والكشف ع الأعصاب
سحر الفلوس والرشاوى بينجح المشلول
ليه اكتر السواقين لازم يسبو الدين
ويشربو مخدرات ويكونو مش واعيين
ليه اكتر السواقين للصلاه تاركين
بجد على أخلاقهم من جوه قلبى حزين
ياسواقين الطرق خافو على الركاب
اللى معاك زي اخوك زي ابنك اومن الاصحاب
دافى التأنى السلامه والوصول بأمان
والسرعه فيها الخطر وكل شيء بحساب
يااسطى خاف ربنا وامشى بالأخلاق
خليك لنفسك قبل السواقه سواق
وبلاش شرب المخدر وخاف على الأرواح
ربك هيستر طريقك ويوسع الأرزاق
التعليقات مغلقة.