نصيحة …كلمات اسماء محمد
البحر لو عالي..
خليك حريص من موجه
لا ياخدك الريح ..
ولا تشقى بعذابه
خليك على البر..
قالوا اللي ع البر شاطر..
فاهم صعوبة المخاطر
البحر ليه ناسه..
وانت لا مراكبي ولا صياد
بيرمي في شباكه
واضحك في وش الناس
وانت صاحي من نومك
اوعاك تبوز..
اضحك مالهمش ذنب الناس
تشيلها في همومك
والبس اللي من توبك
ماحد يقدر يلومك
لا يعتبوا على مشيتك
ولا حتى لبسك هدومك
لا هي بجمال الشكل
ولا هيَ بالمظهر
أهم شئ يشغلك
ياصاحبي دا الجوهر
وافرح مع الناس..
اوعاك تعلا وتتكبر
واعمل اللي عليه تقدر..
إياك في يوم..
تسمع كلام يكتفك
ده كلام الناس..
لا بيقدم ولا يأخر
وخاف م العويل..
ان شافك فرحان..
عليك الفرحة يستكتر
اعمل بأصلك..
صدقني أكيد تقدر
وابني قصور المحبة
بينك وبين الناس ..
راعي شعور اللي دايما
يابني تلاقيه حساس
أصل الضعيف في الزمن ده
ياعيني آه ينداس
دول كلمتين قولتهم
وخلاص نصيحة مني
تسمعها مني عشان
تعيش مرتاح
في وسط الناس
التعليقات مغلقة.