ياليل ياعين ياليل……بقلم اشرف الشناوىشاعر عاميه المنصوره البرامون
نزلت سوق الهنا
أقطع توبين افراح
قالولى مالك دوا
غير الوجع وجراح
فرشولى حلمى فى فضا
وسابونى من غير غطا
ودموعى تملا براح
انا قلبى باش م العرق
كان نفسه يوم يرتاح
وروحي متشعلقه
تعبت سنين م العوم
لا بر باين لها
ولاحست بطعم النوم
ياليل ياليل ياليل
ياعين ياليل ياعين
موالى طال وانكسر
والصبح جاى محنى
انا كل مانوى اطير
صيادى يلمحنى
يرميلى سهم الردى
طاير بيدبحنى
يامين ياخدنى معاه
ويفهم فى يوم لحنى
يافجر مد ايديك
خدنى وعدينى
واوعاك فى بحر الشوق
تنسى وترمينى
دا انا قلبى دايب هوى
من قبل ماتجينى
وكسرت فيا الامل
والحلم فى سنينى
وسقتنى مر الزمن
طرحت بساتينى
لاورد فتح لنا
ولا دمع ساب عينى
ياليل ياليل ياليل
ياعين ياليل ياعين
ياحزن دق الوتد
فى الروح والننى
ورميت جراح بالهبل
زهق الوجع منى
ادينى حبة امل
على بكره طمنى
ياتسيبنى اطير فى الفضا
يمكن اشوف حلمى
يمكن اعيش ضحكتى
لو حتى بالمللى
ياليل ياليل ياليل
ياعين ياليل ياعين
وفرشت ليل الاسى
وكتبت موالى
وتعبت من دا الغنا
وقفلت حوالى
لا فى يوم لقيت الهنا
ولا حتى فى خيالى
تعبت م الغربله
على فرح متدارى
ملقيتش غير الوجع
قاعد فى غربالى
ياليل ياليل ياليل
ياعين ياليل ياعين
ياكل مين عاش فرح
يارب عقبالى …………
التعليقات مغلقة.