وشايل من هموم الناس …بقلم الشاعر رضا ابو شنب
وشايل من هموم الناس
ومين عني يشيل همي
وياما اديتهم الاحساس
وهما بياخدوا من دمي
*
وضاع مني الدهب والماس
وابويا مات ورا امي
بقيت وسط البشر بنداس
وشوفت القسوة من عمي
*
شربت المر ملو الكاس
وزاد اخواتي من غمي
بايدهم رفعوا ايد الفاس
وليه يااخواتي ظالمني
*
تبيعوا الود والاخلاص
ومين غيركم يطمني
ومين هسند عليه الراس
ومين علي الشدة هيعني
*
بقيت ماشي وانا محتاس
في وسط الناس ومتغمي
بدور يومها علي الاحساس
وادور علي اللي راح مني
*
قابلت من البشر اجناس
وناس علي روحها بتغني
وناس تعمل خدودها مداس
لناس بتدوس و بتسمي
*
وناس تعشق خدود الناس
وناس بتحب في النني
وناس تسرق بكل حماس
وناس في الزفة بتهني
*
مليت الورقة والكراس
وخدت الحبر من دمي
كسرت السجن والحراس
وقلت يارب شيل عني
*
انا مليت يارب خلاص
ومين غيرك هينصرني
بعيد عنك انا محتاس
وشايل هم مش همي
بعيد عنك انا محتاس
وشايل هم مش همي
*
التعليقات مغلقة.