روحى فيه بقلم.وحيد على الجمال

فسري الحلم اللي بينا
و ابعتي ليوسف عليه
و إن ماردش يوم عليكي
عند سجنه واسأليه
ليه بشوفِك جوه منه
فارده ايدك فوق عينيه
رافضة حتى أعرف دا إيه
قلت يمكن صعب أشوفك
رحت أدور في الطلاسم
في الرسايل
عن دليل واضح ما بينا
أمشي و اوصل من عليه
كل ده و أنتِ شَايفه
نفس حلمي و حَاسه بيه
تيجي قبضة خانقة صدري
تقلب الحلم لكابوس
باعرف إن المحنة جامدة
باجري و أبكي كتير عليه
شيء غريب شيء عجيب
هو إيه رابط ما بينا
غير سراب
حتى جرح العمر بينا
صار تراب
كل حاجة بينا راحت
إلا روحي لسه مرسومة
في عينيك
لسه عايشه بين إيديك
وحي بينا شايفه نازل
بالقصايد كلها مكتوبة فيك
و إن لمحتك مرة ماشي
جنب مني
ضِلنا في الأصل واحد
بس عايش جوه مني
و جوه فيه
لما طال الحب بينا
راح طاردني زي سحر
مسه فيه
و صابني بيه
يبقى حل السحر زار
و اطفي بينا أي نار
زاد في بعده و المرار
كل واحد راح لحاله
إلا حاجة لسه ربطاني بروحك
عايشه فيَّا
و ساكنه فيك.