ملاك الشوق .بقلم.حسن أبو عرب
ياملَاك الشوق الطاير
بجناح الحلم الوردي
يا أمل متعلق
بين السما و الأرض
اسمح للحلم يعَدي
لا انا قادر اقول اهواك
ولا قادر يوم انساك
وسنين العُمر بتجرِي
وبحَايِّل فيها تهَدِّي
ومابينا كتير مسافات
وآهات على أمنيات
والحِلم مابينَّا بيكبَر
والشوق جوَّانَا بيسرِي
والحُب ربيعُه يِزَهَّر
والسما ونجومها تنَوَّر
وبنادي عليك ياحبيبي
ولا حاسس بِيَّا دارِيبِي
ودموعي تبَات على خدي
فتهز الريح لقلُوعِي
وتحاول تطفِي شموعي
فأَدَارِي عليها بيَدي
الهجر فى بُعدَك نار
وفى بحر عنيك محتَار
فيخُدنِي الريح ويوَدي
ياملَاكِ البحر غريق
ولا مرسَى لقيت وطريق
والقلب ابيض وبرِئ
بيحِبَك حُبُه الأبَدِي
هاسرَق م الليل أسرارُه
والضي اهديكِ نهارُه
واسكُن قلبِك وديَارُه
وسفِينةِ الحب تعَدِّي
يا سواد الليل الحالك
وقمر مفتُون بجمَالِك
تِدَّارَى الشمس بشالِك
مسكِين والَّلهِ ياقلبي
عاشق ولإمتَه تِخَبِّي !!
التعليقات مغلقة.