ورده فى كتاب العربى … بقلم اشرف الشناوى شاعر عاميه المنصوره البرامون
الليل مسامير
بيدق فى نن عينيك
اوجاع
ويشخبط عالجدران
وبيرسم عفاريت
ودموعك تغسل قلبك
وتهز الافراح
وتدور على روحك جواك
وحليم بيغنى لفاتن اهواك
لساك مستنى الحلم
اللى حلمته زمان
والبت اللى صورتها
مش عاوزه تفارق بالك
فاكر ضحكتها
اللى بتخطف قلبك خطف
فاكر فى عينيها
الصبح النور
فاكر شفايفها البنور
فاكر برفانها المشهور
فاكر اول ورده اديتهالك
ورسمت عليها خيالك
خبيتها فى قلب
كتاب العربى معقوله
قلبك لساه بيدق
من سنه اولى
اول ماتشوفها بياخدك
شوقك تانى
وتحس بدق جديد
مش برانى
معقوله بترسم لسه
فى ملامحها
مع ان الوجع اللى فى قلبك
من ايدها
وهتنسى الجرح
اللى بيكسر فى ضلوعك
ودموعك
والليل اللى بينهش قلبك
زى الكلب المسعور
معقوله تلف الدنيا وتدور
وتمد لقلبك حبل النور
وتحس بروحك زى ماكانت
طايره زى العصافير
والشوق بيزق الباب
وبيزرع قلبك ياسمين
معقوله هترجع م الاول
تستنى البنت إم فيونكه
وغمازتين
مع ان الليل بيدق
فى قلبك مسامير
فازاى راح تفرد
فى جناحك وتطير
وتصيد من تانى العصافير
صدقت خلاص انك ميت
والبنت اللى انت بتعشقها
طلعت رسمة طباشير ……… …
التعليقات مغلقة.