لحن مالوش عازه….بقلم اشرف الشناوى شاعر عاميه البرامون المنصوره
صباح الخير على الرقه
ووش ملاك
بيرمى الحب عالسكه
من الشباك
صباح وردى صباح نادى
صباح الفل والياسمين
صباح شايل عرق شغال
بيملا المروى والحوال
صباح بيدق فى اوتاده
ورب بيرضى فى عباده
صباح طارح امل وحياه
وخلق بتجرى عاللقمه
فى ارض الله
صباح واخد امانينا
يرسينا على المينا
ويرسم بكره فى الصوره
ويرمى الفرح بالتوره
نكمل فيه اغانينا
ونرمى حمولنا والقسوه
ويطرح ليلنا مية موال
صباح الفل عال العال
على النجمه على القمره
اللى فارده الشال
صباح الفل ياريحة
وجع بيفوح
وايد تلمس جراحنا تروح
ولمتنا فى تاقيله وتعسيله
ترد الروح
هوى طايب يزغزغ روحنا
ويسقيها ويطريها
ويطبطب عالجراح فيها
وصبح بيلفق الضحكه
نقوم ونكمل الرحله
نعدى الوقت والمحنه
صباح الفل عالدنيا اللى
فاتحه ايديها
وتعمل عقد بقلوبنا وبايديها
ونجلى قلوبنا بدموعنا
نعدى الليل بمية قارب
ونهرب م الوجع للنوم
نشيل القربه فوق راسنا
وحراسنا حدادى ولوم
صباح فاتح على قلوبنا
هويس رياح
بياكل فى الشطوط ويرمى
وجع وجراح
يدق فى عضمنا ويطحن
فى كل صباح
صباح القسمه والحوسه
ياموكوسه
ياارض بتعشق الكوسه
ومية بوسه على خدك
ومين قدك بتاكلى فى لحمنا
الطازه
مالوش عازه صباح تانى
مادام ميت والحانى
محدش غيرى بيسمعها
ووزعها وعميانى ………………..
التعليقات مغلقة.