كمل طريقك …بقلم اشرف الشناوى شاعر عاميه البرامون المنصوره
علشان نعيش
تبقى الحياه
عاوزه التحدى
عاوزه اللى يصبر
واللى يضحك
واللى غير
لونها وردى
عاوزه روح
من غير جراح
شايله الامل
علشان نعدى
الحياه
مش طبطبه
ولاحلم طالع كركبه
ولا مصطبه
هى الحياه
طول ماانت فيها
معركه
علشان تعيش
لازم تحارب كل يوم
دا البحر لازم
تنزله وتعدى عوم
والريح بتقلع
اى عود بيكون طرى
لازم تعدى مهما كان
الريح قوى
عافر وشيل الصخر
اهون م الوجع
وازرع غيطانك ضى
هاتحس بشبع
لو حلم دايب
كمل الحلم برقع
كل السكك
فيها اللى كمل
واللى تاه
واللى وقع من طوله
هايكمل ب اه
واللى انكسر
راح يفرمه
ترس الحياه
بكره اللى جى
بضحكتك
هاتعيش معاه
كمل طريقك
وافرشه بالامنيات
اجمل غنا يطلع
ويكبر م السكات
كمل حياتك
لو بحبة ذكريات
اجمل مافيك
هاتحس بيه
لو حتى مات …………………..
التعليقات مغلقة.