طرح الوجع …شعر وحيد على الجمال
كرمشت وشي في وشها
كانت مشاعري وقتها
تشبه كتير لوح الخشب
وضربت باب النرفزه
ظهرت مواسم للعتاب
مربوطة في توب الغضب
ولوت لها ميت الف بوز
وقعدت مرزي جنبها
انفخ وعبي في الهوى
من غير رموز
حتى السؤال اللي اترمى
من غير ما تعمل مندبه
كان لسه كاتب ترجمة
بس بطريقة مؤلمة
كبر الفراغ بينا اتسع
والصمت زود في الوسع
وطلع له سور
كانت بتسال نفسها
وتلف تعصر بعضها
يمكن تحس بذنبها
فتقوم تثور
شلال بيجري ع الخدود
عمال يفور
مسحت دموعها بكفها
صورلي مشهد م الخيال
أن الاجابه في السؤال
صفحة جديدة هتتكتب
واللي انكسر بينا اكيد هنصلحه
راح يبقي ماضي ملوش مكان
خبطت كفوفها في الهوا
الحلم طار
واحتلت الصرخه الودان
انا مش لوحدي المجرمة
انت شريك في الاتهام
انت الملام ولو مش انت
يبقى مين؟!
مش كل حاجة عملتها
كانت بتيجي بعدها كلمة امين
أنت الإمام وقت الصلاة
واحنا وراك المأمومين
تروح شمال تروح يمين
انت الزعيم
وفي لحظة بينا اتبدلت واتغيرت
بينا الصفوف
وجمعنا طرح ملهش طعم
وطرحنا جمع بألف شمل
والحمل زاد أصبح تقيل
ولقينا فرق شروخ كتيير
والذنب أصبح مستحيل
اوعاك تعيش دور البتول
تبكي وتلعن في الندم
وتكون مثالي في الألم
جرحك خجول
ملعون ياحب إذا كان
بقى طرحك وجع
له الف وش والف لون
التعليقات مغلقة.