عتاب … بقلم الشاعر وجيه وسلاتي …قصيدة هزجيّة بالعاميّة المصرية
حبيبِ القلب بيقولّلي
نِسيتني ولّا إيه يعني
مَفيش كلمِة بَحِبِّكْ يومْ
ولا عن قلبي تسألني ؟!
جاوبت وقلت إيه يَخْتي !!
سِبيني فْ حالي دلْوقتي
بقيتِ اليومْ دا زعلانة
مَاطولْ الوقت شيْفانا !!
وعينِكْ سارحه ويّانا
وفجأة بقيتِي عشقانة ؟!!
قالتلي إنتَ مش حاسس
بِقيمةِ الحبّ يا وردة
مشاعركْ وانتَ يا فالس
بقت زيّ الشّتا باردة
بِتوصلْني عشان حاجتك
وتقطعني وانا جنبك
تعدّ اليومْ وْ متزبّط
واقُولْ طيب عَلى راحتك
حَسيبك تفضى يوم يِمكن
تفوق م النوم وتتحرّك
التعليقات مغلقة.