خلى بالك .بقلم. اشرف الشناوى
خلى بالك م اللى حبك
واوعى تقسى فى يوم عليه
واوعى تجرح قلب حبك
او تعاتبه ازاى وليه
القلوب دى ملك ربك
كلها فى كفة ايديه
واوعى مره يطول خصامك
روح بسرعه اسأل عليه
دى الحياه حبة دقايق
عيشها دايما وفى سعاده
خلى دايما ابتسامتك
فوق ملامحك تبقى عاده
لون الايام واوعى
تسيبها مره تبقى ساده
عود القلب السماح
واوعى تغضب
دا الغضب نار للجراح
خلى دايما جوا منك
شبر واحد م البراح
وازرعه حبة اغانى
تلقى فيه عوض اللى راح
مد ايدك للى حبك بالسلام
عرفه الحب الحقيقى مش كلام
طول ماقلبك صافى وابيض
يبقى راح تعرف تنام
الاحبه وفى عتابهم
زى انواع الحمام
لو يولف جوا غيه
تبقى لحن وللغرام
خلى باب الحب دايما
مهما كان خليه موارب
واوعى تكسر قلب حبك
كان فى يوم مجداف وقارب
الجراح بالحب تدبل
والحياه معمل تجارب
ياما عشاق قبل منك
ماتوا وقلوبهم تحارب
خلى بالك م اللى حبك
واعمله عالرمش حاجب
اشرف الشناوى
شاعر عاميه
التعليقات مغلقة.