ومين يقدر …شعر إبراهيم شافعي
ومين يقدر يسد الباب
ف وش الريح
ومين يقدر يرجع للحزين فرحه
وقلبه جريح
ولا نعاتب ع اللي خاف
وقال اهواك ولو تلميح
ولو سألوه عن الاحباب
يرد صريح
أنا عمري ما شفت الحب
ولو تفاريح
ياخوفي م اللي ساب قلبه
يقاسي الشوق
يعيش التوهه وحداني
لا عمره يفوق
يبان فرحان ومتهني
وهو في الهوى مخنوق
بلاش النظرة في عيونك
بتفضح حب مداري
بلاش ترسم ع الوشوش ضحكة
ويعرف شوقك اللايمين
كتير هايقولوا حب وداب
وزاد واحد على المجانين
ومين هايقدر الشوق
اللي في ضلوعك
ومين هايطفي م الحنين جوعك
ومين في الناس دي يا مسكين
تظنه ف لهفة لرجوعك
ومهما تعاني م الأشواق
هاتبقى في هواها جريح..
التعليقات مغلقة.