ياعم صابر
بقلم أحمد كريم
يا عم صابر
ياللى انت صابر
على الهَوايِل
عَمّال بتشقَى
وياريت بتِلقَى
طالع ونازل فوق السقايل
موجوع وصامت
والبَطن صامت
واللُّقمه غابت
ولا انت قايل
شايل همومَك
ومقَضِّى يومَك
واخد طريقك
على جسر مايل
ساكن فى عِشَّه
مسنود بقَشَّه
لَو مَيَّه نزلِت
هَتروح نسايل
كان نفسى تفرح
وتلاقى مطرح
وتِبقَى فُلَّه من غير جمايل
كان نفسى آجيلَك
واكون دليلَك
أو حَتَّى ادِلَّك
على حَد طايل
بس الحقيقه
أنا برضُه زيَّك
فى الهَم خَيَّك
وِ ف قلبى شايل
في الهم خيك وف قلبي شايل..
جميل… تعبر عن ظروف الكثيرين في هذه الاونه…