طعم البيوت … بقلم هنا سعد
طعم البيوت ف حتة السكر
بيها المرار بيروح وبيها نتصبر
من غيرها البيوت بتموت
من غيرها نتكدر
أمك دى زينة البيت
اوعى فى يوم تنكر
مهما عليها قسيت
لقسوتك تغفر
دى قلبها من ماس
وقلبك أنت نحاس
وهبها رب الكون
قلب بميزان حساس
إذا شَكِّتك شوكة
تحسها قبلك
تجري عليك قبلك
وقبل كل الناس
عايشة بتديلك
من عمرها بحماس
نايم ومطمن
وعيونها عليك حراس
مناها بس تشوف
فرحتك ف عينيك
ودعاها ليك فى الجوف
ربنا ينجيك
تقوم ف عز البرد
تسقيك محبة ودفا
فتنام وتطمن
وتنسي بيها الخوف
تنبهك دائما
وتحذرك م الشر
وترشدك علشان
مايجرجروك للشر
تزعل وتاخد جنب
تجري عليك بحنان
ياواد (ماتبقاش غبي)
خايفة عليك م الشر
دعوتها بر أمان
لا تضر ولا تنضر
اشبع وملي عينيك
دائما بشوفتها
وسيب وراك دنيتك
واسمع لحواديتها
ضلل عليها بقلبك
واشبع بلمستها
لتفاجأك الأيام
وتفوق بدفنتها
طعم البيوت بيغيب
من بعد غيبتها
افراح بدونها تنوح
تقفل بيبان بيتها
والدنيا مرها زاد
أشواك ف سكتها
التعليقات مغلقة.