أم العيون سمرا …بقلم سيد جعيتم
على جدران معبدك
حياتي منقوشة
ومغروزة في جدرانك
وأنا الواعظ وأنا الكاهن
وأنا الحارس على بابك
وأنا الحاضن لأعتابك
يا شجرة فل و ست الكل
أنا جايلك أشوف الحسن
يا أم الشعور طايلة.. ومايله
كاسية الأرض تحتيكي
ونتجمع في ضلايتك
فرشاها برمش العين
يا زينت الزين يا قمرا
يا أم العيون سمرا
طول الليل مع نيلك
أغني وأقول مواويلك
و احكيلك ولا أنسى
ولا لحظة أتوه عنك
يمر العمر يتدحرج
وأنا جدرك وأنا صدرك
وحبيتي تيجي تتهادي
تنادي و إيدي في إيديها
نزيح الدودة من أرضك
ومن قطنك ننقيها
ووقت الراحة نتجمع
نفرد منديل محلاوي
وجبنة قديمة .. ولقمتنا
عيش فلاحي ومرحرح
وعود جرجير يشبعنا
وأقوم تاني أجيب قمحة
وازرعها في جميزة
تطرح كل يوم شجرة
والحنطة تبقى بالكوم
يا ام الشواشي دهب
سبحان يا بلدي من وهب
وطرح البركة في ولادك
أنا أحمس انا تحتمس
أنا حامي حدود أرضك
بقلم :سيد جعيتم
جمهورية مصر العربية
التعليقات مغلقة.