بتجمعنا الحياه مرة…شعر السيد الشيتى
بتجمعنا الحياه مَره
ومية مره تفرقنا
ونضحك والحياة مُره
ونجرى وهي بتسوقنا
نقرب م الحياه تبعد
ونجري وراها تسسبقنا
بنبعد جرحنا يكبر
ونار البُعد تحرقنا
ونسرق م الزمن لحظه
نجدد فيها أشواقنا
ياريت الدنيا تسمعنا
ونور الحب يجمعنا
يلم إل إنكسر فينا
يطمنا يواسينا
وأشواقنا تنادينا
حنين الماضى يروينا
ويمسح دمع أيامنا يدواينا
ياريتنا نحس بعيوبنا
نطَّهَّر بالرضا زنوبنا
ونور الحق يهدينا
نِنوَّر بيه ليالينا
ونرجع نحضن الايام
وننسى مرارة الآلام
ونرسم بالأمل مشوار
وليل العتمه
يبقى نهار
و ترجع تانى ضحكتنا
نزوق بيها سكتنا
ونغزل من ليالى زمان
حكاوى تسعد الوجدان
وتروي عمرنا العطشان
نقول دا العمر صالحنا
وبيطبطب على جراحنا
وننسى الهم والاحزان
التعليقات مغلقة.