وعند الله تجتمع الخصوم…شعر السيد الشيتى
وعند الله تجتمع الخصوم
ويتقابل هناك ظالم
مع مظلوم
مفيش منصب ولاأسامى
ولا جلسه ولا محامى
مفيش مالك ولامعدوم
هناك الناس بدون تمييزهتتحاسب
مفيش واسطه
ولا مغصوب ولاغاصب
امام الله هتنطق
كل جوارحنا
هتتكلم بصوت الحق
تفضحنا
هنتحاسب بكشف حساب
رباني
ومجنى عليه هياخد
حقه م الجانى
وهنعانى ونغرق فى
عَرَق مَحموم
وناس راضيه
وناس هاديه
وناس خايفه
عذابها يدوم
فى يوم هتسيبك الدنيا
وتبقى وحيد
وبصرك يومها يامسكين
هيبقى حديد
ميراث الآخره أعمالك
وغرس الدنيا راسمالك
أمام الله الظلم إسم
ملوش وجود
والعدل نوره ف السما
مالى الوجود
دا محكمة السما
عادله ف تقاريرها
مفيش كرسى
ولا منصب يغيرها
صوت السما تخضع له
رووس كل العباد
لابيحكمه أحساب
ولا أنساب ولاأسياد
التعليقات مغلقة.