دواير بقلم الشاعر/ علي يحيى
بشوف العدل في مربع
التساوي فيه مثال
والشموخ والإستقامة
حاجة تتحدى المحال
إللي فوق زي إللي تحت
واليمين زي الشمال
كل أضلاعه تناغم
في التراحم والوصال
والبراح في الوسط واحد
للحوار أو للسؤال
وف ميزانه كله وفى
حقه في حدود الكمال
بس كف الدنيا مايل
مره فاضي ومره شايل
مستحيل يبقى المربع
ع البسيطة له جمايل
البارود في التو نسفه
وبعده غنى كل مايل
ع المسارح والدواير
والهموم طالت جدايل
الضلام دستور وداير
ع إللي نايم وإللي داير
والحقيقة سكات وعتمة
أو متاهة في الدواير
التعليقات مغلقة.