كرباج ورا…كلمات الشاعر وحيد على الجمال
أنا مش هبرر غلطتي
وأنكر وكابر
واحبسني فيها وأضمها
قال يعني ماكر
وافتح جفوني واردها
وأفركها ثاني في بعضها
وارجع واعبي في بحرها
مر المواجع
أنامش راح ادخل خلوتي
وانا فيك صايم
واعلني راضي ببلوتي
و احسبني صابر
دروشة نفسي بحبها
وانا لسه شايل ذنبها
هي الحقيقة وعكسها
سميني عابر سميني فاجر
وغصب عني وعنها
طلقت شعري منها
أعلنت نفسي بعدها
بالشعر كافر
لازم تغير سكتي
و أرسم لي خطة لقصتي
لسه مصدق عصمتي
لما أعتكفت في ضلها
مصلوبة فيكي كدبتي
ورجعت أفسر غلطتي
نفسي بتشرب غيها
في كأس الجروح
ورجعت أردد اسمها
والشرخ كاسر بعضها
راسم وشوش تشبه لها
والضل نازف دمها
رافض يسافر بعدها
يعمل عبيط يعمل نبي
أنا جوه عمري السرمدي
مستني وحيك يبتدئ
الموت بيحسب خطوتي
إمته هيقرا فتحتي
لسه الجنازة مودعة
آخر ملامحك يا وطن
من غير مايلبس لك كفن
مع أنه نهبك من زمان
ومسجلك ضمن العزب
فتش خصومك وافتكر
أن الخريف ملهوش صحاب
و إن الفصول عاشت تخاف
مهما الربيع قدم لها
جنة بيعشقها السحاب
لازم تخاف
الوهم في دماغك غبي
عايش بياكل بعضه حاف
أنا مش هفتش في الرزيلة
ولا هبقى يوم صاحب فضيلة
اخنق بها دروب الخيال
ليه دايما الصدق العبيط
ملهوش مكان
و لا سعر واضح أو ميزان
بركة بيحمد ربنا
مالهوش في شعر السلطنة
كرباج ورا
قيس اللي فاضل من هواك
بالمسطرة
لسه بتحلم بالمدينة الفاضلة
تخنت وكبرت اتكعورت
تقصدها مين
هي المدينة الفاضلة
أنا نفسي مرة أكتب رومانسي
حاولت مرة وقلبي تاه
أخدني مني مشيت معاه
على قد عقلي بعتلي بيت
وقعني غفلة في شر نفسي
ولبست فجأة في قلب حيط
أنا واقعي وبألف بيت
وحروفي تصهد تنشوي
ولع قاعات المحكمة
وازرعني غيط
يمكن تغير حكمها
تعملي بيت ينفع يكون
قبلة لموت قاصد يعيش
أنا لسه رافض إني أموت
وبرغم إن الساعة كانت للكلام
لكنها عدت سكوت
الشعر آخر معجزة ظهرت لنا
جوه معابد حبنا اللي انتهت
مطلعشي مرة لا في جريدة
ولا في ديوان
لما اكتشفته بعدها سلم
دفاتره كلها وفي لحظة مات
العمر فات
كرباج ورا
التعليقات مغلقة.