ارفعي قلوعك يا مصر…كلمات الشاعر رضا ابو شنب
ارفعي قلوعك يا مصر
انتي جنه كل عصر
مهما حاولوا يكتفوكي
يجي بعد العسر يسر
ارفعي قلوعك يا مصر
انتي يا بلادي الجميله
عشتي وسط الكون اميرة
لو مكاني علي الحصيرة
جوه منك يبقي قصر
ارفعي قلوعك يا مصر
في التاريخ كنتي الحضارة
كل شارع جنب حارة
والكنيسه في حضن جامع
ياخدو منك الف درس
ارفعي قلوعك يا مصر
في الكتاب اسمك منور
لما يوسف كان صغير
كان بيدعي لرب واحد
بعد ظلمه يلاقي نصر
ارفعي قلوعك يا مصر
موسي يخلع نعله فيكي
حتي عيسي بيدعي ليكي
والرسول وصانا بيكي
لو في ايدك الف كسر
ارفعي قلوعك يا مصر
ارفعي قلوعك وغني
دانتي ست الكون تمللي
دانتي ابويا وانتي امي
وانتي خالي وانتي عمي
وانتي روحي وكل دمي
وانتي جنة كل عصر
ارفعي قلوعك يا مصر
التعليقات مغلقة.