حوار عاشقين كلمات الشاعر/ محمد سيوفي
هو :
إعترفتي ليه بحُبِك
وقلبك ناوي يزيد شجوني
قوليلي ليه دايمٱ في قُربِك
تهرب عيونك من عيوني
قلبي يقرب حَبّه حَبّه
وقلبك يبعد مسافات
ليه قاتلني الشوق محَبّه
وإنتي عاشقه للسُكات
الغرور شَيّطن ظنوني
والبعاد زود جنوني
دقات قلبي بتعاتبني
ودقه دقه بيلوموني
هي :
أيوه قلت إني بحبك
والغرام دبّل جُفوني
أبعدك وأموت في قُربك
وأعشقك لو يقتلوني
وأقنِعك إني عنيده
وإني مُغرمه وسعيده
إمحي مسافاتي البعيده
وإسكُن الضي ف عيوني
هو :
قلبي يا عمري شاريكي
ويعشق الضي ف عنيكي
والهجر ده لو غِيه عندك
صابر ومتشوق إليكي
كُترالبعاد بيجيب جفا
ويمحي م القلب الوفا
قلبي إلّي حالف يشتريكي
مُشتاق لأيام الصفا
التعليقات مغلقة.