زار … شعر وحيد علي الجمال
زار زار زار زار
شوفت الليلة انا حلم كبير
دمه إن جيتوا للحق تقيل
كان ممنوع فيه التأويل
هو بحالة أصله مريب
يشبه فيلم طويل و سخيف
بس الظاهر كان تخاريف
مافهوش حبكة ولا تشويق
حطيت صوتي جوه رغيف
كان فسفوري وشكله مخيف
التحاليل قالت تهويل
خالي حقيقي من التطبيل
والكومبارس مابيمثلشي
حتي كلامه مابيعلمشي
ولا بيأثر في التسقيف
زي مااكون واقف في الغيط
بزرع علبة م الكبريت
بس الأغرب م اللي حكيته
إنها طرحت بعد ما كبرت
نار بتهد حيطان البيت
رقص وزمر وخلق كتير
مابتتعبشي من التنطيط
قمت ربط الشمس بخيط
واتشقلبت عشان غنيت
قال لي ياواد انت اتجنيت
أنت عليك حبة عفاريت
لازم تشتي عشان ارقيك
ونضحي بحبة براغيت
لاجل ما جلدك يبقى تخين
هات كتكوت من غير منقار
واعمل دايرة من الأسرار
واختار شلة من الأشرار
أذبح قطة واسلخ فأر
قبل الليل مايولع نار
أعمل حفلة للصرصار
وزع كفته بالكاڤيار
علق يافطة في قلب الدار
إنك كنت عبيط وحمار
وإنك صرت من الأخيار
حاسب إوعي تصدق نفسك
أنت يادوبك حافظ اسمك
جوه طابورك قادر تسكر
دانت كمان بحترت السكر
بعد الوسطة واقف تتغندر
هما كيسين اثنين مش أكتر
هاج الموج وف لحظة اتوتر
والسما بدأت تاني تمطر
حلم عبيط مش قادر افكر
عمال كل شوية يطول
حبل أفكاري كله اتكعبل
ماشي بكلم نفسي وأحور
بين أحلامي بقيت متسول
نفس الحالة كات عم نول
بعد ما عدت الفيلم البايخ
سف شريطه وجه م الاول
نفس غبائه مش متطور
قمت ونفسي كان مكروش
أصلي مفلس كدا منحوس
علم ياله وخد مظروف
من وكستي أنا كنت هموت
قلبي بيصرخ من غير صوت
خدت أجازة م الباركود
وتأسفت لورقة حظي
كنت عاملها حجاب معقود
التعليقات مغلقة.