بأمارة إيه طالبين جنه . بقلم.محمد سيوفى
قلبي الموجوع من أحوالنا
بيستفسر يسأل يتمنى
لو واحد عاقل فهّمني
بأمارة إيه طالبين جنه
…..
بأمارة الفجر وصلاته
هاجرينُه ورافضين خيراته
غير بس شيوخ رُكْع سُجْد
بسببهم تِنزِل رحماته
بأمارة إيه طالبين جنه
…..
بأمارة غزه المِتحاصره
داخله في ١٠٠ يوم تطلب نصْره
واحنا من الوكسه وم الحسره
بننام ونقوم نملا بطوننا
بأمارة إيه طالبين جنه
…..
بأمارة الجاهل رافعينه
والعالم مكروه سايبينه
والفاهم فينا بنهينه
والأمم الباقيه بتسبقنا
بأمارة إيه طالبين جنه
…..
بأمارة العِلم الّي انداس
ومعادش كمان في الكُراس
والقُدوة سفيه أو رقّاص
والبوصله ضاعت من عنواننا
بأمارة إيه طالبين جنه
…..
بأمارة العدل في أراضينا
تايه مش راسي على مينا
والظلم بكيفنا وبإيدينا
بقى رايه لينا ودليلنا
بأمارة إيه طالبين جنه
…..
بأمارة الصادق يتكذِب
والكدّاب هو الّي بيغلِب
والأخلاق حاجه بتتعيب
والفُجر ده غالب أفعالنا
بأمارة إيه طالبين جنه
…..
بأمارة الرحمه المنزوعه
وصلة الرحم المقطوعه
والود الغايب مش حاضر
والباكي بحُرقه على حالنا
بأمارة إيه طالبين جنه
…..
دي الجنه بتنده أحبابها
مشتاقه وجاهزه لأصحابها
رجاله صدقت في وعودها
وهبت لله روحها ومالها
واحنا مجّاني بنتمنى
في الآخره نشوف باب الجنه
بأمارة إيه طالبين جنه
القوّال سيوفى
التعليقات مغلقة.