“ورا باب الزمن”
شعر سيدة القصاص
ورا باب الزمن
بصيت
لقيت الذكرى
مركونة
مسكت ف ضلفته
بإيدي
ركنت بروحي
على بابه
ونزلت دمعتي
سايحة
وشاورت ليا
محزونة
وبعد ما صِفْيت
الراكية
اللي قادت فوق
صفا قلبي
قعدت أقلِّب
الكراكيب
لقيت فرحاية
مكنونة
ولوحة حزن
مدهونة
بلون الشيب
دخلت لجوة
جوة كمان
لقيت حدوتة
ملفوفة على ورقة
غرام مجنون
وظاهر فيها جنية
خدودها الوردى
محنية
وعطشانة لحنية
وف إيديها
ألم وظنون
فقلت اتقام يجوز
ارتاح
من الخانقة اللي
دارت بي
وجدت مرايا
مكسورة
وقفت أتملَّى
ف الصورة
بابص لقيتنى
أنا هيَّه
ولابسة روحي
جنية
و ( بتهاتي )
ف زمن مخيون
.
التعليقات مغلقة.