” اه يا عرب ” بقلم/ عبدالسلام عبدالنبي
نفسي اسال
ليه يباح دم الشقيق
نفسي اعرف
مين العدو مين الصديق
حاجات تحير
زمان اتغير
في الحياه تاه الهدف
ايه الهدف يا زماننا قول
انطق وقول ايه الهدف
لمين يكون العتاب
لمين يكون الهمس
لمين اغني غناوي الحب
من تاني
لمين ح تعزف يا عود الحب
الحاني
مساحات من الضي وبتلمع
مع التهديف
مساحات من الضي وبتقتل
في زمن الخوف
ووسط ضي الشمس تلقي
شعر اسود لون سواد الليل
وعيون بتبكي وتتعذب وطفل عليل
وعدو بيقتل شهيد
وتضيع يا بلدي
وأماني حلوه وراحت
يا خساره يا ولدي
وعيون بتدبح عيون
ورصاصه غداره
ويضيع ربيع الامل
وعروبتي منهاره
المكان ارض العرب
الزمان زمن العجب
الجاني عاش وسط العرب
قتل الجمال خنق الطرب
يسدل سواد الليل ستايره
ع البلاد والليل بيستر
المصور لسه قاعد منتظر
لاجل ما يلقط يسجل احلي منظر
صوره الليل والسكون
والقمر نوره بيسحر
ويدق جرس الخوف
وتهب ريح سايله خراب
الكل يسال ايه جري
الصوره يخنقها التراب
وفجاه تلقي وحش كاسر
بس لابس لبس جندي
يقتحم عش الاميره خدرها
اسوأ تحدي
وتحاول الام الدفاع
ويكون وليدها يا ناس رهينه
وايه يكون تمن الرهان ه
تدفن خلاص روحها الحزينه
وتسلم الام الوليد ويقتلوه
وتضيع معاه الامنيات
والاه. حزينه
المصور لسه قاعد
جنب كاميرا زمان عجيب
يلقط الهدف اللي دم
لازم المجروح يطيب
اصل دم الحزن نازف
ع الرمال
الرمال ح تبقي نار
علي اي حال
قطره الدم اللي راحت يا وطن
حتبقي نار ضد العدا طول الزمن
ح تبقي شجره غل سوده والتم
حزن واسي وجراح دفينه والوهن
الله اكبر قوم وقولها للولد
الله اكبر عزم قوه صمود جلد
الله اكبر دم عربي للابد
التعليقات مغلقة.