” نيل وغناوي ” بقلم/ أشرف الشناوي
راح الدفا ويا الايام
ماعدش غير حبة احلام
محلا الكانون والطبليه
والفرن قاد م الفجريه
وحمام بيشغي ويملا الدار
وراديو بيردد اذكار
وعيال تطير زى العصافير
شايلين امل والحلم كبير
وقطر بيصفر ويفوت
ويهز في الصفصاف والتوت
ويشيل لبن على جبنه قريش
ويروح علي البندر مايجيش
واخد معاه كل الدراويش
ووابور طحين يطحن غله
طول النهار بيقول توت توت
يرمي الامل يخضر بيوت
ونيل بيحضن في مراوي
يسقي الغيطان ويرمي غناوي
تلقى السبل يحبل بالنور
والفل والياسمين عالسور
وبنات بوقصه وضفاير
زى الحمام طاير طاير
بين البناني يقول مواويل
وراكية الشاي فواحه
تشمها تحس براحه
ونكمل الليل بالحواديت
السندباد ويا العفاريت
وننام على الضحكه ونصحي
نلاقي دنيتنا الواسعه
مليانه بالخير والقناديل
والمكن داير دوار
بيسقي ويبوس في النوار
محلا البيوت بالطين والخوص
ولا عمرها طرحت في لصوص
كل البيوت صبحت عيره
واتخن مافيها ياناس بلبوص
راح الدفا واهو كتر السوس
صبح الأمل
عفريت في فانوس
التعليقات مغلقة.