“احلَم معايا باللقا” شعر/ حسن أبوعرب
انا السجين اللى بعشقِك
اتسجَن
مابين آلام ومابين آهات
وبدون تمَن
أنا سجنى كان بين الضلوع
وصديقتى كانت وِحدِتِى
ويَّا الدموع
سجانى كان هُوَّ الزمن
حاولت اتُوه وِسط الزحام
وادَاوِى جرحى بالكلام
أهو يمكن انسَى للى كان
لِقيتنيى بسأل عنَّهَا
نبض المكان اللى اتهجر
واللى اتسكَن
واتارِى قلبى بحُبهَا
دايب صبَابه فى عشقها
والدنيا عندى كلها
ماتساوِى لحظه فى قربهَا
من سحرهَا قلبى اتفتن
سألت عنهَا العاشقين المبتلِين
قالُولِى فات يابنى الأوان
بالعشق قلبك اتعَجَن
وصعب تنسى للحبيب
اللى مَلَك رُوحَك سَكَن
احلم معانا بالُّلقَا
يمكِن فى يوم تلقَى الحبيب
ويْضحَك لِنَا تانى الزمن !!
التعليقات مغلقة.