شعر ومكسور .بقلم.مدحت رياض
حبل الأفكار مبقاش موصول
مع نبض الروح
والشعر تفكر فيه وتقول
في ثواني يروح
اتمد ما بينهم بعد كبير
واترصوا جروح
كل الأفكار في خيال محتار
بتكون أيتام
حتى الأحلام
بتكون في خنافة مع الايام
وانت المقتول ..فاكتب أو قول
ان انت نسيت جرحك مفتوح
ونزيف البعد بيرسم خط
وبعدك عنه
مهوش مسموح
وطريق مكتوب لك
تفضل فيه
وملهش رجوع
قلبك موجوع
وهيحصل ايه لو عدى العمر
في خنقة وضيق
وتمد إيديك
تتعلق فين والقش غريق
بينادي عليك تاخد بأيديه
فبتحضن فيه وتغيب ويغيب
تحت الأنفاس
يتلموا الناس
لو صحيوا وغبت وقلبك مات
نعي الأموات بيخلي الكل
يكون موجود
فبلاش تستنى وترسم حلم
في كف الريح
كل المجاريح
كانوا أكتر ناس بتداوي جروح
الجرح يلم ان كان ملمسش
جدار في الروح
والروح مخلوق وكأنه ازاز
دايما شفاف
مكشوف للكل ان كان خواف
فاكتم في الحزن ان كان موجود
واكتب ع الجرح كأنه ورود
وإن غاب الشعر متندهلوش
واتمنى يطوِّل بعده عليك
لو كان موجود هتكون مجبور
تفضح له الحزن بخط ايديك
ده الكسر في بيت اهون بكتير
من كسرة حزنك جوة عنيك
التعليقات مغلقة.