ناديت محدش سمع … بقلم اشرف الشناوي شاعر عاميه البرامون – المنصوره
ناديت على قلبي
من وسط الوجع
ماسمعش
شديت حبال الأمل
من جرحي ماطلعش
ياروح يافارده القلوع
على بحر مالح
لاموجه مره هدي
ولا شط ليه بيبان
ناديت عالصبح
ميل هنا
شاور لي قالي زمان
ياشمس دفت بلد
فايتاني ليه بردان
يادمع واكل ملامحي
ومفرح الغربان
من يجي الفين سنه
واقف كدا عريان
يافجر فين المني
والفرح ليه خزيان
والضحكه واقف لها
عالباب ميتين سجان
امتي ياليل تنكشح
والنور يهل يبان
قلبي خلاص انكسر
م الذل والحرمان
لا طعم بان للغنا
ولا روحي فيها مكان
وخادني ياما الزمن
على سكة الدراويش
عداني مره وطلب
علشانها ميت بقشيش
وقالي طير يابطل
من غير جناح ولا ريش
ناديت ياقلبي مدد
من يومها ماسمعنيش
دخلت قبر انكتب
على بابه مات درويش
صحيت لقيتني في بلد
ماحد فيها يعيش
غير النجيل والغلت
وشوية الطرابيش
التعليقات مغلقة.