قصيدتي العصية… بقلم وحيد علي الجمال
تصدق بإني مخاصم حروفي
وحالف عليها ماتجي تزورني
وقافل عليها بيبان القصيدة
وخايف لا يظهر عليها ارتجالي
دليل اندماجي بِوَحي المعاني
بَرَهبِن في نفسي واصَوْمَع في بحري
وازوّد إيماني بزهدي اللي طاغي
وسر اندهاشي وُجُود المعاصي
أسيرة في ذاتي وكفة ميزاني
كأنِّ اللي تابوا وراحوا وغابوا
بيفضل أثرهم عليهم يشاور
ووحيِي اللي ماشي في دمي ووريدي
بيهمس في روحي و يضرب سكوتي
كأنِّ في إيديا عصاية لموسى
تِحوّل في وجعي وتقفل شروخي
في ساعة التجلي بشوفك في حلمي
واضمك في ضلي
فتظهر نبوءة وجودي في منامك
وبركب سفينة تأكد عبوري لنقطة غيابك
فتظهر صحيفة سوابق مجوني
حريص ان يفضل
تاريخك في شعري بداية رسالتي
وأحلى وأصعب ماشافت مسيرتي
قرار انسحابي مكنش احترازي
وكل الأدلة تأكد براءتي
فكانت هزيمتي بداية حكايتي
بضمِّد جروحي اللي باتت عصية
و بشكي وبلعن عهود الأسيه
شيطاني اللي وسوس لنفسي وأسس
وحرض عليا ضميري اللي باعني
وسابني فريسة دموعي ومشاعري
في آخر فصول الرواية الكبيرة
وقبل ما تنزل علينا الستارة
حذفني في مشهد لقاء الأميرة
وعدِّل نهاية قصيدتي القديمة
وثبت عليا شكوك الجريمة
يا شكلي اللي ساكن
حيطان الأماكن
يا أول حبيبه أجرّب بعادها
وأول ضحية بغير طريقها
وتارها في طوقي محاوط رقبتي
هقابلك ف مره وكفني عليا
ياإما بايديكي تصفي اللي بينا
ياإما نغير مسار القضية
وتفضل قصيدتي عليكي عصية..!
……………………….
وحيد علي الجمال
التعليقات مغلقة.