حلم …بقلم مدحت رياض
لما حسيت بالأمان
يومها قلبي أعلن العصيان
عشانك
سابني رغما عني واستنى
في مكانك
وابتديت آخد خيالي ف حضني
واحلم بالساعات
واملا عمري الجاي
وأكتب ذكريات
لما أقابلك وأما اشوفك
وأما هلمح لون كسوفك
وأما نبني البيت محبة
وأما حزني جوة قربك
يستخبى
وأما نكبر واحنا حاطين
إيد في ايد
وأما بيكي
يبقى كل العمر عيد
كل يوم اروي في خيالي
وأبدا ازرع يوم جديد
ان بكرة بيكي أجمل
وان عمري الجاي يشمل
كل لحظة تكون سعادة
حبي كان مع كل دقة
حاجة تشبه للعبادة
بس لما جريت صارحتك
اتهدم كل اللي كان
والخيال بقى شى سخيف
كل حلم أنا بيك حلمته
انقلب لكابوس مخيف
والليالي تلوم وتشمت
في العيون السهرانين
لما ليل العشق يسأل
كنت سهران فيه لمين
لما حبك شئ خيالي
وموش مقدر ليه يدوم
ليه بتكدب ع الليالي
ليه بترسم ع النجوم
لم حلمك لو فيه باقي
لسه ما اتكسرش لوم
لو في يوم هتنام وتحلم
يبقى يا ابني بلاها نوم
التعليقات مغلقة.